สำบายดีครับ
มื่อนี่บ่าวฮู้สึกว่ามิมีลมวอย ๆ พัดวี่ ๆ มาเว่าง่าย ๆ คือ ลมหนาวเริ่มสิมาแล้ว บ่าวกะเลยคิดว่าสิพาลงทุ่งไปหาหนูมาขั่วคือสิดี ว่าแล้วกะเข้าเรื่องกันดีกว่าเนาะ
หนู ที่หมู่เฮานิยมนำมากินกันกะคือ หนูพุก หรือ หนูนา (บ้านบ่าวเอิ้นจั่งซี้บ่ฮู้บ้านอื่นสิเอิ้นว่าจั่งได๋) หนูมักสิพบพ่อได้หลายบัดยามเข่าเริ่มสิออกฮวงเฮากะสิเริ่มเห็นหนูหลายขึ้น หนุพุกหรือหนูนา มักสิขุดฮูอยู่โพน หรือนำคันแท มักสิออกหากินยามหลางคืน วิธีไปหากะมีอยู่หลายวิธีนำกันนั่นคือ
๑. การอ่อยไว้ยิง นั่นกะคือบัดยามตะเว็นบ่ายกะไปหาฮูหหรือทางเทียวของหนูไว้ แล้วจากหั่นกะเอาฮวงเข่าไปวางล่อไว้ใกล้ ๆ พอแต่ตะเว็นตกดินซึ่งเป็นเวลาที่หนูออกหากินเฮากะออกไปจอบอยุ่หม่องที่เฮาเอาเข่าไปวางล่อไว้ พอแต่หนูมากินเข่าเฮากะเหนี่ยวไกปืนแก๊บได้ทันที ระวังให้ดีให้เล็งที่หัวเด้อ คันเล็งหรือยิงถืกโตมันสิเละ
๒. เอาแฮ่วหรือบ้วงไปดักเฮากะเพียงแต่ไปหาฮูหรือทางเทียวของหนูให้พ่อ แล้วกะเอาบ้วงหรือแฮ้วไปดักไว้ยามแลง แล้วยามมื่อเซ้ากะจั่งไปยาม
๓. หนูอาจสิบ่ได้อยู่แค่ทุ่งนาบางเทื่อกะอยู่นำโคกนำป่ากะมี นี่ละครับหม่องม่วน บัดยามออกไปหากะซวนกันไปเป้นกลุ่มคันไปผู้เดียวกะอาจสิเมื่อยแหน่ คันมีหมาไปพร้อมกะแห่งดี พอแต่เห็นฮูหนูแล้วกะให้หมาดมเบิ่ง คันแม่นฮูนั่นมีหนูอยู่หมากะสิเริ่มขุด จากหั่นกะสำรวจให้ทั่วว่ามีฮูหรือแปวของหนุอยู่บ่ คันมีกะอัดไว้อย่ให้ออกได้ ให้เหลือแต่ฮูที่เฮาสิขุด แล้วกันให้หมาออกจากฮูแล้วเฮากะเริ่มลงมือขุดแทน ผู้ลางคนพอแต่ขุดไปได้จักคราวเผิ่นกะเอาน้ำเทลงไปในฮู ลางคนกะขุดไปจนสุด พอแต่ขุดใกล้ฮอดหรือว่าน้ำท่วมฮู หนูกะสิแล่นออกมาให้เฮ่าลัดไว้ให้ดี อย่าให้หลุดไปได้
วิธีการนำมาปรุงอาหาร
พอแต่ได้หนุมาแล้วโตได๋บ่ทันได้ตายกะเฮ็ดให้มันตายก่อนเด้อ แล้วกะเอามาถอนขน โดยการเอาขี้เถ่าทาให้ทั่วแล้วกะถอนขนเพื่อบ่ให้หนังลอกออกมา จากนั่นกะเอาไปลนไฟให้ขนที่เฮาถอนออกบ่หมดได้ไหม้ไป จากหั่นกะเอามาล้างน้ำให้สะอาด แล้วกะคัวไส้ออก หรือผู้ลางคนยามถอนขนเผิ่นสิลวกน้ำฮ่อนก่อนค่อนถอน พอแต่คัวไส้แล้วกะเอามาเฮ็ดซึ่งกะแล้วแต่เฮาสิอยากเฮ้ดหยังเพราะว่าหนูสามารถเอามาเฮ็ดกินได้หลายเมนู นั่นกะคือ
๑. เอามาขั่ว วิธีการกะคือเอาหนูที่เฮาคัวแล้วมาฟักหรือมาสับต่อนน้อยต่อนใหญ่กะแล้วแต่มัก แล้วกะเอามาลงหม้อใส่น้ำจักหน่อย ตำบักพริก หัวชิงไค ใส่เพื่อดับกลิ่นคาว พอหนูสุกกะเอาผักคุณตู่หรือแมงลัก ผักบั่ว ต้นหอมลง ปรุงรสด้วยน้ำปลา ผงชูรส อยากกินรสเก๋งหรือปิกอัพกะปรุงเอา คนให้เข้ากันตั้งไฟต่อจักหน่อยแล้วยกลง ตักใส่ถ้วยกินกับเขาหนียวฮ้อน ๆ แซบขนาด
๒. เอาหนูที่คัวแล้วมาหมักกับเกลือจักหน่อย ซอสกะหยอดลง บวกกับรสดี จักหน่อย แล้วกะเอาไปย่างไฟพอสุกแล้วหนูกะสิมีสีเหลืองหอม เอามากินกับเข่าเหนียวฮ้อน ๆ บู๊ยยยยยย.......เอาปิ้งไก่มาแลกกะบ่ยอม
๓. เอาหนูไปหมักจักหน่อยแล้วเอามาย่างไฟจนสุก จากหั่นกะเอามาฟักแล้วเอาไปปรุงคือจั่งก้อยกะปอมหรือน้ำตก เครื่องปรุงกะคือกันเครื่องปรุงน้ำตงหรือว่าก้อยกะปอมนั่นละครับ แล้วแล้วกะตักใส่ทิดเอาเข่าเหนียวฮ้อนคุ้ยกับผักกะโดน......
โอ๊ย......เว่ามาน้ำลายไหลแล้วหละครับ
Bookmarks