คั่วหนูพุก
มื้อนี้ฅนภูไทไปไต้หนูได้หนูพุกมาโตหนึ่ง ตอนแรกว่าสิปิ้ง แต่ย่านบ่พอกันกินกะเลยสิคั่วหนูสู่พี่น้องบ้านมหากิน มาๆๆผุได๋บ่เคยกินกะมาเบิ่งวิธีคั่วหนู
ขั้นตอนแรก กะเอาหนูมาถอนขนออกให้เบิ้ดก่อน การถอนขนออกขนกะมีหลายวิธี วิธีแรก หมกใส่ขี้เถ้าแล้วกะถอนพอเสร็จกะเอามาลนไฟ วีธีที่2 เอาหนูไปลวกน้ำฮ้อนแล้วจั่งถอนขนออก วิธีนี้ใช้กับหนูพุกรึหนูแผงได้ทอนั่น ส่วนหนูท้องขาวใช้บ่ได้บ่หนังมันบางมันสิเปื่อยทิ้ม นอกจากวิธีนี้แล้วบางคนเขากะถะลกหนังออกกะมี
หนูที่ถอนขนออกเบิ้ด ผมใช้วิธีลวกน้ำฮ้อน
เสร็จแล้วเฮากะเอาหนูไปสับ เครื่องปรุงกะมี ผักชีลาว ต้นหอม ผักอิตู่ มะเขือ พริกกับตะไคร้ตำ ที่ขาดบ่ได้กะคือปลาแดก
เอาหนูกับพริกตะไคร้ตำ มะเขือ ขึ้นตั้งไฟ ใส่น้ำปลาแดกลงไปนำ
คั่วจนกั่วสิสุกให้เข้าเครื่อง จนหอม แล้วจั่งใส่น้ำลงไป
พอน้ำเดือดใส่ผักชี ต้นหอม ผักอิตู่ลงไป ปรุงรสตามใจชอบ
เสร็จแล้วกะตักใส่ถ้วยมากินกับข้าวเหนียวฮ้อนๆได้เลย เคล็ดลับ อย่าเอาใส้ทิ้มเด้อครับ ให้รีดขี้แก่มันออก แล้วเอามาสับใส่นำกัน มันสิเฮ็ดให้รสชาดดีขึ้น ออกขมอ่ำล่ำ คือคั่วบ่างนี่หละครับ
Bookmarks