* - * สำ บ า ย ดี . . . ปี ใ ห ม่ * - *

[ตะวันนา]

...วัน...คืน...เดือน ผ่านพ้น............วนเวียนจร บ่คือเก่า
นับมื้อเลยล่วงเค้า.....................ซุมหมู่เจ้าเป็นจั่งได๋
...คันยังทุกข์ยากฮ้าย...................จากปีกลายปีเก่า
อย่าให้หมองอย่าให้เศร้า.............ทุกข์เจ้าจง่จางหาย
...ไผที่เคยพ้อรักพ่าย....................ให้รักใหม่ชื่นอุรา
ปรารถนาแนวได๋........................ให้สมใจในบัดนี้
...สำบายดีปีใหม่แล้ว...................ม่วนโฮแซวอีสานซุ่ม
ขอซุมเฮาจงสุขล้ำ....ฟังหมอลำให้ม่วนกุ้ม....ซุมพี่น้อง..ปรองดองกัน เด้อจ้าเด้อ....

[sompoi]

สำบายดีบ้อหล่าแก้ม คือทรงสิยากน้อน้อง บ่เห็นหน่าดนแล่ว อย่าโหมหลายเด้อว่ายนํากะดาย มันสิจ่อยเด่ะ..บัดสิว่าเอื้อยบ่บอกแล่ว..อวบๆ..เป็นตะฮัก แก้มแดงๆเนาะเป็นตาหยิก..อุอุ..

[NONGNAN]

ปีใหม่มาฮอดแล้ว แนวบ่ดีให้เลยผ่าน
ขอให้แฟนทุกท่าน อีสานนั้นทั่วแดน
ไผขาดแคลนคนเคียงคู่ ให้ได้อยู่อย่างสุขขี
ให้มั่งมีเงินทอง สมปองในทุกด้าน
ใจสมานให้ฮักมั่น ผูกสัมพันธ์ให้หมั่นแก่น
ให้มีแฟนคนผู้ฮู้ ให้มีชู้แม่นผูไค
เดินทางไปเหนือใต้ ไปทางได๋อย่าหมองหม่น
ขอเบื้องบนเพิ่นส่งยู้ ชูค้ำให้ส่งเสริม เด้อแฟนบ้านมหาเอ้ยย

[บ่าวโจ่โล่]

ขอความฮักได้ผูกหมั่น คือจั่งพันสายสินณ์จ่อง ผูกแขนเอาพี่น้อง นำมาคล้องไว้ฮ่วมกัน
บ้านมหาเฮานั้น กะถึงวันขึ้นปีใหม่ ขอความสุขสดใส อยู่ในใจพี่น้อง มารำร้องให้ม่วนแซว
หมดปีเก่าไปแล้ว ให้เหมิดแนวสิ้นความทุกข์ แนวได๋สุขจงถ้วนหน้า ขอให้ฟ้าเผิ่นส่งพร
ขอยกกรเสมอเกศ มีเหตุหยังให้แพ้วพ่าน ขอประทานพรจากฟ้า มิตรทั่วหน้าให้อยู่เย็น
ขอให้เว้นจากโรคร้าย ทั้งร่างกายกะแข็งแกร่ง คนฮักแพงอยู่ทั่วล้า เงินคำถ้าเบิ่งบ่เป็น
แสงตะเว็นสิลับฟ้า แสงหวนมากะมื้อใหม่ คิดประสงค์สิ่งได๋ อยู่ในใจหมุ่เจ้า ผมกะเว้าแค่ส่งพร พี่น้องเอ๊ย

สวัสดีปีใหม่ 2551 นำกันเด้อครับ

[ศรีสะท้าน]

สวัส พิพัฒน์พร้อมน้อมใส่คุณพระศรี
ดี เสมออย่ามีทุกข์อยู่สุขเกษมล้วน
ปี เก่าจวนสิกลายพ้นความสับสนให้พ้นผ่าน
ใหม่ ปีกาลล่วงเข้าขอซุมเจ้าอยู่สบาย

@ ศรีสุมังคะลังเลิศเค้าปีเก่าสิกลายหนี ศรีขออวยพรชัยจากใจมายอน้อม
จตุพรเพียงพร้อมให้สังฮอมเฮียงฮ่าง ความสุขสันต์สืบส่างอย่าไลม้างห่างกาย พระเฮย
เถลิงศกย่างย้ายแถมถ่ายมาเถิง ให้เจ้าเฮิงๆใสดั่งในมณีแก้ว
จงพากันหวิดแคล้วภยันตรายภายโรค อันความทุกข์โศรกฮ้อนให้หายแห้งเหือดคีง นั้นแหลว
ให้เจ้าได้กล่อมกลิ้งอยู่เทิงอาสน์หอคำ แม่นจักทำการสังให้ดั่งโดยเสมอแม้ง
อย่าได้แหงระหองฮ้าวพอศอซาวห้าฮ้อยกว่า ห้าเอ็ดตัวตื่มท้ายกำลังย้ายหย่าวมา ท่านเอ้ยย ฯฯฯ