บังเอิญมีหัวใจ จึงได้โทรหาอ้าย บ่าวพี่ชายแฟนเพิ่น
เป็นแนวได๋ยามห่างเหิน น้องบังเอิญยังฮักอ้าย ชายนั้นสิว่าได๋
แนวว่าใจนางน้อง บ่ได้ครองกะฮู้อยู่ หวังแค่เพียงได้รับรู้
ว่าพี่นั้นอยู่จั่งได๋ แต่เกรงใจแฟนอ้าย ย้านสายตาเพิ่นหมอง
บ่ได้พ้อกันมาดน อย่ากังวลเด้ออ้าย แค่อยากหมายมาถามข่าว
กะย้อนว่าทางน้องสาว บังมีหัวใจนั่น วอนอ้ายไปบอกเขา
คำอำลาวาจาเว้า บอกพอแล้วเด้อเซา บ่ฮักเจ้าแล้วคุณพี่
แต่ว่าใจน้องนี้ พอปานบ้าว่าฮักหลาย คิดว่าน้องใจร้าย
หรือทำลายความสัตย์ซื่อ แต่อ้ายบ่เชื่อถือ คือรับปากกันไว้
เทียวไปเว้าไส่ผู้สาว ฮู้แน่เด้อความปวดร้าว ในใจหนาวฮู้ไว้แน่
หรือว่าอ้ายบ่แคร์ มันเจ็บแท้ที่ฮักเจ้า แต่คำเว้าบอกว่าพอ
บอกไว้เลยอย่ามาง้อ สิบ่ขอรับทราบข่าว ถึงในใจสิรวดร้าว
ขอนอนเศร้า หลั่งน้ำตาถือคติในใจว่า สิขอลาแล้วรักพี่
สิเจ็บปวดทั้งชีวี สิหลบหนีจนสุดฟ้า สิลาแล้วหล่ะรักลวง
บังเอิญมีหัวใจให้ จักบังเอิญแนวได๋ ทางหัวใจมันฮ้อนฮ่น
ย่อนว่าคิดฮอดคน สนผู้มีเจ้าของแล้ว หัวใจแป้วกะแม่นยอม
ฮู้ว่าอ้ายบ่พร้อม ได้ตั้งแต่ถนอม ได้จำยอมพร้อมฮักพี่
ความรู้สึกดีดี บอกยังมีให้อ้าย บ่หมายหมั่นสิยึดครอง
อยากจับจองหัวใจอ้าย แต่กะเหมิดความหมาย ย่อนพี่ชายเป็นแฟนเพิ่น
เล่นกับความห่างเหิน เพลินนำความปาดร้าว เจ็บจ้าว จ้าว กะแม่นใจพี่แนนเอย
คำเอ๋ย.......
บ่แม่นอ้ายแปลปี้นมองหาดอกสาวอื่น
บ่ได้ฝืนจิตตั้งให้นางน้องนั่นหน่ายแหนง
สาวแก้มแดงนางเอ้ยหล่าฟังคำจาของอ้ายก่อน
หัวใจเอ้ยอย่าฟ่าวฮ่อนทองคำก้อนให้ค่อยจา
บ่มุสาหรือเว้าเล่นคนที่เห็นนั่นเป็นหมู่
ย่างคู่กันนั่นแม่นน้องสาวหล่าอีแม่ชาย
อย่าฟ่าวถือโทษฮ้ายมาทำลายหัวใจอุ่น
เจ้าผู้บุญส่งยู้เป็นจริงแท้จั่งได้จา.........นางเอ๋ย
บ่ฮู้ว่ามาืถืกงานบ่น้อนิ
บังเอิญมีหัวใจแล้ว แนวหัวใจมันฮักพี่
แม่นอิหลีติอ้าย ว่าชายนั้นสิแต่งดอง
วาสนาอินางน้อง แค่ได้มองกะอบอุ่น
ย้อนว่าบุญบ่ส่งยู้ สาวครูนั่นแม่นคู่เธอ
ใจละเมอเรียกร้อง มันคือกลองดังบักใหญ่
จั่งได้โทรหาอ้าย ชายเอ้ย ผู้แฟนเขา
เถื่อสุดท้ายนางขอเว้า ด้วยน้ำตาสั่งลาพี่
บ่ได้ครองในชาตินี้ กะดีใจอ้ายฮู้บ่
วาสนาได้มาพ้อ กะพอแล้ว..ใจสลาย
ฝากคำลามาหาอ้าย บ่าวพี่ชายอย่าได้ห่วง
ถึงน้ำตาสิไหลล่วง ทางน้อง สิเช็ดเอง
อ้างข้อความนี้
Bookmarks