................เก็บแฮงไว้เติมฝัน.................

[บ่าวโจ่โล่]

ลมสะบัดพัดยอดพร้าว สีแสงดาวกะสาดส่อง................อ้ายนั่งมองเบิ่งยอดไม้ คือไหวต้องป้องไส่กัน

แสงตะวันกะหลบหน้า ฝากเวหาฟ้ามืดมิด....................เห็นดาวติดนำ แผ่นฟ้า ส่องแสงจ้าระยับยล

ทางถนนคนมิดจ้อย นำซอกซอยคนกะห่าง..................เหลียวไปไสกะเวิ้งว้าง หนทางมืดค่อยมิดแสง

เหมิดยามแลงกะมืดค่ำ งานประจำได้หยุดพัก.................สิ่งได๋หนักหรือเหมื่อยหล้า ขอฝันฝ่ามื้อต่อไป

หยุดเติมใจยามออ่นล้า คือเวลามาพักผ่อน...................เทื่อว่าหัวถึงหมอน หลับตานอนจนว่าเซ้า เฮาค่อยสู้มื้อต่อไป

[sompoi]

หนทางฮกเทียวถากถาง พอได่ย่างยามแปนราบ
บัดยามฮุงเฮืองหาก สิได่ง่ายยามไกลใกล้..น้ออ้าย
อยู่ทางได๋กะใสแจ้งย่อนเหงื่อแฮงเฮาเฮ็ดสร้าง
ยามเปิดหน่ายได่พักบ้าง พอมีแฮงกะผ่องใส
ทางที่ถากถางไว่ คือควมภูมิใจของโตเอง..เด้ออ้าย

[ศรีสะท้าน]

สิเก็บเอาความล้ามาเป็นหนทางไต่
เก็บความทุกข์ยากไฮ้มาเป็นไต้ตื่มกะบอง
เก็บความขัดข้องหมองหมางฮ้างหน่าย
มาเป็นผ้าขี้ฮ้ายถูหม่องบ่อนด่างดำ
เก็บเอาความปวดซ้ำตำทั่งทางใน
เก็บมาเป็นกำลังใจต่อเติมเสริมท้าย
แทนแฮงกายและใจสู้บู๋ทางให้ม้างส่วง
เก็บเอาสิ่งทั้งปวง มาเป็นยาหยอดต้อยใจข้อยสู่ฝัน

ปล. โอ๊ยย จั่งแม่นตั้งชื่อกระทู้ให้ข้อยไปนำยาก อาวกะดาย ซั่วสิแล้วเหมิดไปเป็นกั๊ก อิ อิ อิ

[น้ำตาล]

เอื้อยมิค/ใหย่ศรี/อ้ายบ่าวโจ่โล่....สุดยอดเลยค๊า...อั่นหล่าไปบ่เป็นได้แต่นั่งงึดจ้า:g:g:g

[ศรีสะท้าน]

เห็นความมาจาต้านตาลหอมหวลหมาก
อยากเอามาไว้ใกล้ในข้างบ่อนครัว
คือสินัวหวานจ้อยคำออยเพิ่นอ้อยอิ่น
บ่อได้กินขอแต่เพียงแนบข้างบ่อขอฮ้างห่างมะโน

ขอมาใส่แกงเขียวหวานแหน่หล่า น้ำตาลแมะ อิ อิ

[บ่าวโจ่โล่]

ดึงตะเว็น เข็นแผ่นฟ้า ยกจันทราเอาแสงส่อง..............โปรยดาวกองกลื่นฟ้ า ให้ฮุ่งจ้าระยับแสง
ขอเอาแฮงวายุฮ้าย โบก ระบายสายลมผ่าน................พัดหยดน้ำจากสายธาร หว่านเป็นหมอกเกลื่อนแผ่นหล้า พรมต้นหญ้าทั่วแผ่นดิน
ฮ้องโผผิน บินโบยโบก คือหมู่นกสกุนา......................ชวนกันกลับสู่เคหา ฮ้องสั่งปลา ธารา น้ำ
มาลางาม ตามคันห้วย ออกดอกสวย ดูสง่า.................หลบภมรซ่อนสายตา นำพฤษาแมกไม้ วายุไล้กลิ่นระเหย
กลิ่นรำเพยดอกคัดเค้า เห็นเป็นเงาต้นสะมั่ง.................ราตรีมิดค่อยปิดบัง แสงที่ยังส่องใต้ ไฟหิ่งห้อยปล่อยตะเกียง
มีแต่เสียงจิโป่มน้อย คอยบรรเลงเพลงกล่อมป่า............เสียงนกฮูกกูกแว่วมา บอกเวลาว่าค่ำค้อย เดือนดาวน้อย ค่อยส่องแสง
เหลือใจแฮงคันเป็นได้ คือหัวใจอ้ายฝันว่า...................อยากหยิบเอาดวงดารา อยากนำพาดาวใหญ่น้อย มาคอยป้อนเข้าไส่มือ...น้องหล่าเอ๊ย


เอาของเก่า มาเล่าให้อ่านใหม่ดอกผมกะดาย ฮ่า ๆ ๆ

[ศรีสะท้าน]

กลอนก่ายเกี้ยวกุมกอดคำผญา
เป็นไปตามจินตนาหนึ่งในใจอ้าย
บ่อแม่นหมายมาส่อสับสนวนบังเบียด
อย่าได้เคียดคั่งแค้นแคลนคล้อยให้ค่อยจา
เฮียมบ่ออาจกล่าวท้าหักไม้ข่มเต็งไผ
เพียงอยากไขคำควรพอม่วนหูดูบ้าง
เอาแต่บุญผลาสร้างพอเป็นทางได้เทียวไต่
เป็นแฮงใจสืบตั้งบาดยามท้อได้ต่อเติม

[บ่าวโจ่โล่]

คำบรรยายหยาดเยิ้มเคลิ้มนำคำเว้าไส่
จาความขัยแต่งแต้มตำต้องก้องไส่ใจ
วาจาไขคือขัดข้องขึงขังคำเคร่งเครียด
ไผมาเบียดเบ่งบ้อหรือขอถ้าว่าพ่อลุง
เฮาปรับปรุงแปงบั้นสร้างสรรค์พอเว้าหม่วน
ไผมากวนก่อแกล้งแฉลงเว้าเข้าไส่น้อ
ซ่อยกันยอยกย้องปรองดองให้คนซ่า
บ้านมหาผญาหย่อยซ่อยกันสร้างบ้างชื่นชม เนาะลุงเนาะ

[ศรีสะท้าน]

เก็บความอุกอั่งเอ้ามาเป็นเสาค้ำก่าย
ความเบื่อหน่ายเมื่อยล้าเป็นฝาแอ้มโอบใจ
เก็บความในที่หมองเศร่าตางฟืนเผายามหนาวผ่าง
เก็บเอาความอ้างว้างตางหญ้ามาบมุง
เก็บเอาความมาดมุ่งไว้คิดอ่านสานฝัน
เอามาเป็นแกวพันฝั่นเฝือเฟือเกี้ยว
พอเป็นเกลียวเหนียวไว้สายใยบ่อให้แล่ง
เก็บเอาแฮงที่แต่งฝั่นสานฝันแต้มต่อเติม

[สาวบ้านนา]

เก็บความเมื่อยล๊า... เมียบ้านเฮา...อาบน้ำเย็น เย็น... กิ๋นเข่า... พักผ่อนคือการนอนหลับ...