ยามเดือน 4 ทางอีสานบ้านเฮากะสิพากันเอาบุญเผวสกัน แล้วกะสิฟังเทศน์มหาชาติกัน
พอดีมื่อนี่กะเป็นบุญเผวส แล้วกะเป็นมื่อฟังเทศน์พอดี แม่ใหญสีเลากะจัดการอาบน้ำแต่งโตตั้งแต่เซ่า หิ่วกะต่าหมากได้กะย่างเข้าวัดเพื่อสิไปฟังเทศน์ ปรากฏว่ามื่อนั่นคนกะมาฟังเทศน์กันจนแน่นศาลาหาทางสิย่างออกไปทางนอกกะบ่มี แล้วพระเพิ่นกะเทศน์ม่วนขนาดจนบ่มีไผลุกไปไสเลย
ฝ่ายทางแม่ใหญ่สีพอพระเทศน์ไปได้จักคราวเลากะเอาหมากออกมาเคี้ยว จักคราวเลากะจกกะต่าหมากหากระป่องถ่มน้ำหมากกะบ่มี หาถุงพลาสติกกะบ่มี เลาเลยตัดสินใจกอบมือแน่น ๆ แล้วกะถ่มน้ำหมากใส่ฝ่ามือเจ้าของ พอแต่น้ำหมากเต็มกอบมือแล้วกะคึดว่าสิเอาออกไปถิ่มทางนอก ปรากฏว่าคนแน่นออกไปบ่ได้ เทิงเลากะย่านน้ำหมากเหี่ยใส่หมู่นำ เลากะเลยหูบเอาน้ำหมากในมือจนหมด แล้วกะเซ็ดปาก เซ็ดมือ เทิงจ่มอยู่ผู้เดียวเลาว่า
นี่! ปะสาหม่องถ่มน้ำหมากมันสิยากอีหยัง
แล้วกะนั่งฟังเทศน์ต่อไป
Bookmarks